Nokkur ráð við þreytu og orkuleysi
Hér eru nokkur atriði sem við þurfum að huga að svo við höfum næga orku og úthald til að sinna daglegu lífi og til að hafa aukaorku til að geta spilað golf.
Svefn
Meðalsvefntími er í kringum 6 tímar hjá fólki á dag, en mælt er með 7–8 klukkutímum svo líkaminn geti náð að byggja sig upp og hlaðið batteríin fyrir næsta dag. Ef við erum undir of miklu álagi hækkar hormónið cortisol, við það missum við orku sem við þurfum á að halda fyrir næsta atriði sem er líkamsrækt.
Líkamsrækt
Við höfum öll notað afsökunina „ég hef ekki tíma“ en við verðum að gefa okkur tíma fyrir einhvers konar líkamsrækt eftir að golfgöngutúrarnir eru komnir í vetrarfrí. Gerum eitthvað í vetur sem byggir upp úthald og gefur okkur meiri orku. Það er erfiðast að koma sér af stað svo best er að fá vin eða maka með sér í heilsuátakið, þannig eru minni líkur á að við hættum og gefumst upp. Munið að það er nóg að æfa í um það bil 30 mínútur annan hvern dag til að ná góðum árangri.